Ođđa stivrajođiheaddji Norgga Samemišuvnnas

Norgga Samemišuvnna buot 8 biirre ledje ovddastuvvon go 58 sáttatolbmot čoahkkanedje riikkačoahkkimii Ålesundii mihcamárvahkkoloahpa. Dan muitala sin preassadieđáhus. Ovddit jagiid riikkačoahkkimiin lea digaštallojuvvon galgá go Samemišuvdna šaddat Misjon Sarepta oassin ja dan láhkái maid heaittihuvvot. Liige jahkečoahkkimis jagis 2021 Dalenis Eidsvollas hilggui nana eanetlohku ovttastuvvama Sareptain. Riikastivra oaččui bargun ođđa evttohusa buktit mo hukset biirriid, ođđa strategiijaplána hábmet ja ovddidit ođastuvvon vuođđonjuolggadusaid ovdal go dábálaš jahkečoahkkin fas čoahkkana jagis 2023.

Dán jagás jahkečoahkkimis geavahedje buori áiggi dáidda áššiide. Ođđa vuođđonjuolggadusain lea deattuhuvvon ahte mišonbargu galgá dáhpáhuvvat lagas ovttasbarggus sápmelaččaiguin. Ođđa struktuvra, mas leat gávcci biirre njealji regiovnnas, lea dál sajis. Ruhtadili dáfus riikastivra buvttii ovdan rehketdoalu mas lea «hui smávva vuollebáza». Dat lei vejolaš go ledje lassi sisaboađut. Vaikko ruhtadilli dál lea dohkálaš, de riikastivrra ovdaolmmoš čielgasit cuigii dasa ahte jus dábálaš ruhtaskeaŋkkat eai lassán, de ruhtadilli fas mannagoahtá heajut guvlui.

Jon Teigen lei buoriáiggis dieđihan ahte ii joatkke riikastivrra ovdaolmmožin, maŋŋil dan gáibideaddji golmmajagiáiggi goas organisašuvdna fas lea huksejuvvon ja ealáskahttojuvvon.

Torbjørn Bjorvatn lei evttohas ja riikastivra válljii su dievaslaš doarjagiin. Son lea Agdera universitehta vuosttašamanuensa ja su bargosuorgi doppe lea jođiheapmi ja organisatuvrralaš prošeaktajođiheapmi. Sus lea maid oasseáiggevirgi Samemišuvnnas regiovdnajođiheaddjin. Danin riikastivra dagai spiehkastatmearrádusa vuođđonjuolggadusain, mii rahpá vejolašvuođa dasa ahte virgáibiddjon olmmoš sáhttá muhtin diliin maiddái leat stivrajođiheaddjin.

Earát riikastivrras leat: Sámi áirasat: Johan Isak Siri (Guovdageaidnu) ja Karen Anette Anti (Málatvuopmi) ja várrelahtut Magnus Varsi (Deatnu) ja Ellen Kari Anti Sara (Máze/Guovdageainus). Dáru áirasat: Stein Ingvar Kalviknes (Sandnes) ja Marit Grøtte Børnes (Trondheim) ja várrelahtut Inge Augestad (Kvam i Hardanger) ja Harald Claudius (Horten). Bargiid áirras lea Øyvind Fonn (Molde). KPK

LAST NED KORTSAKEN PÅ SAMISK, BOKMÅL OG NYNORSK HER

Oversatt til nordsamisk av Rávdná Turi Henriksen